makadandaniwenak la unay

makadandaniwenak la unay. adtoy man ngarud, pamadasan no ammo pay la datao ti pumutar iti texto a gamdek nga awagan kas verso wenno kas daniw.

Wayawaya

"Clocks cry: stillness is a lie, my dear"
                                --Sylvia Plath

pimmanaw a di man la nagpakada. dinak
naawatan idi nagparintumengak iti sanguananna
saak naggarakgak iti uray la, idinto
a malmalpes ti nabasa a payong nga insuksokko
iti suli. nakapigpigsa ti bayakabak
iti ruar, a naggapuak. ngarud pinanawannak,
rimmuar, sinarakusokna ti tudo, inagnaganannak.
idinto a nargaan ti turog ti nakadalikenken
a pusa iti pagpigadan, duduayyaen
ti bukodna nga urok, agin-inudo
iti naimeng a salikepkep ti nabara a kukotna.
pimmanaw a dina man la inuray a makatakderak.
nabatiak a mangdildilpat iti nagmaga
a bibigko: maramanak pay laeng ti alsem
ti imbakuarko nga isem.

dimo pulos pagtalkan ti darikmat. silulukat
daytoy a kas iti wangwang a garapon
ti asukar, a kutkutonen, agaw-awaaw ti sam-itna.
nupay agibit daytoy iti nakair-irut nga ibit: kas
iti kappo a nasulek, aglulua, nakaul-ulimek.
ngem pinanawannak a ti pakadana laeng
ket litoklitok ti takonan a sapatos.
diak pagtalkan ti ulimek. marunrunot
daytoy a kas iti agnunnunog a tikap a yelo
iti arak, malmalmes, agsaysayasay ti lamiisna.
ayatko, nannanamek pay laeng ti apgad
ti dara iti nagarumiadan, nakagatko a dilak.