mannurat.com mannurat.com mannurat.com mannurat.com mannurat.com mannurat.com

mannurat.com 4/13/2006

pasken-tmi filipinas: umuna, nangyuna

kalkalpasna ti umuna nga asemblea nasional ken literary studies ti tmi filipinas, ti timpuyog dagiti mannurat iti iloko (iluko), maysa a baro nga asosasion dagiti mannurat nga ilokano nga agsursurat iti iloko.

nakaiwakas iti maysa manen a makuna a pioneering a gakat ken gapu iti pakasaritaan ti literatura nga iloko wenno literatura dagiti ilokano. pioneering, kunak (ket bukodko la a kuna ken pangsirigan daytoy), ta unique ti napasamak nga asemblea a nairanta a talaga para iti panagadal iti literatura. maysa a talaga literary workshop ti kangrunaan a naobra.

nakadar-ayak. nupay kinamkamakamko dagiti actividad ta saanak a nakaviaje tapno masambotko ti rugi ti asemblea iti malem ti abril 7. ngem nupay naladawkami a dimteng ken jane (baketko), ta sakam la nakaviajen iti bigat ti abril 8 ket nalabes a pangngaldawen idi makadanonkami idiay bayombong, nadanonmi ketdi ti adu pay a kakadua (sumagmamano ti nagawiden/nakaawiden) ken adu pay nga actividades.

natural, kas met la gumilan ken ginnumil daytoy a pasken. ta pasken la ngarud met dagiti mannurat. ngem adda la ketdi, a, met pakaidumaanna iti tradisional a pasken ti gumil. ta kas nadakamaten, nakatalimudok daytoy iti literary studies. ket ania pay nagum-uma dagiti dimmar-ay a nagad-adal, nakiinnadal kadagiti nalalaing a mamannurat a nagservi kas panelistas, resource experts, literary gurus.

saanko unayen a dakamaten dagiti naar-aramid a literary studies. saanko ngamin a natugawan (ta naladawak met) ti kaaduan a session. ngem nabunga la ketdi. adu ti agdadamo a mannurat nga adda, adu ti manuskrito a naisaang a maadal, adu ti bangolan a mamannurat nga immay: adda da appo prescillano bermudez, peter la. julian, julio belmes, franklin macugay, rogie baysa, mindo aquino, demosthenes mauricio, glicerio gallardo, jack reyes, baltazar eduarte, sa ni john buhay. ania pay ti sapulem no dagita ti kainnadalmo, langilangan kada premiado a mamannurat, iti panagsuratan iloko?

maitalimudok iti purely literary studies ken literary criticism ti/dagiti actividad ti tmi filipinas maigapu iti maysa a kangrunaan a gapu ken kagagapu no apay, in the first place, a nabuangay wenno timmaud daytoy a timpuyog--isu ti panggep a pannakatakuat, pannakamuli ken pannakataraken dagiti mamannurat iti iloko (agdadamo man wenno saanen) nga agsurat, ania pay. ken agsurat nga agsurat no ti panggepna ken kayaagsurat. saan la nga agsurat, nasken a makaipablaak pay met a kadagiti tradisional a pablaakan a tradisional a patien a pakatestingan wenno pakakitaan (kano) iti inalat ti kinamannurat. ken mangabak pay, a, kadagiti tradisional a pasalip iti panagsuratan a tradisional a patien (manen) a pakasubokan wenno pakapaneknekan (kano) iti siglat ti maysa a nalaing (tradisional a nalaing) a mannurat.

panggep ti tmi filipinas ti "agaramid" kadagiti mamannurat. wenno agtakuat ken mangdurog kadagiti "nayanak" a mamannurat ngem dida ammo a mannuratda gayam ta nasadutda wenno awan mangdurog wenno mangtignay kaniada tapno agsuratda ket mulien ken asaenda ti nakayanakanda a talentoda.

panggep ti tmi filipinas nga iti uray tinawen, addada baro a mamannuratna a tumayaktak. pagarigan, makapablis iti bannawag wenno mangabak kadagiti salip, wenno makapartuat iti thesis wenno dissertation wenno uray ababbaba laeng a papel a sukisok iti literary studies/criticism.

panggep dagiti maseknan a kameng ti tmi filipinas ti mangawis ken mangtaraken kadagiti mayat nga agadal ken agsursuro. tunggal maseknan a kameng, sumapul koma kadagiti interesado nga agdadamo a mannurat tapno agbalin nga adalanna wenno protege wenno apprentice no isu. suruanna daytoy, ibingayna amin nga ammona ken uray pay dina ammo, itedna amin a "palimedna" iti panagsuratan. agingga a makaipablaak metten daytoy nga adalan. agingga a mangabak metten daytoy nga adalan. uray agingga a nalalaingto payen daytoy nga adalan ngem ti maestronan.

ngem nakaaduak metten. ituloytayto daytoy a sasao kadagiti sumaruno a panablaag.

kabayatanna, adtoy ti sumagmamano a ladawan kabayatan ti asemblea (pamakpakawanan dagiti nalipatak ti naganna, appo, ipankonto met laeng no maalak ti kompleto a listaan):


Sumagmamano kadagiti dimmar-ay. Nakatugaw, agpakanawan: John Buhay, Romulo Mandac, Demosthenes Mauricio, Franklin Macugay, Rogie Baysa, Amadeo Dulay, Roy Aragon, Warlito Manuel. Nakatakder, agpakanawan: Freddie Dugas, , Rizalino Viernes, ___, Glicerio Gallardo, Jack Reyes, ___, ___, Baltazar Eduarte, Erik Balisi, Mary Jane Aragon, Peter La. Julian.



Dagiti baro nga ofisial ti TMI Filipinas iti panagsapatada babaen ken Apo Peter La. Julian, adviser ti timpuyog: John Buhay (presidente), Romulo Mandac (tesorero), Demosthenes Mauricio (auditor), Franklin Macugay (bise presidente), Rogie Baysa (secretario), Amadeo Dulay (p.r.o.), Roy Aragon (business manager), Warlito Manuel (director). Awan iti ladawan ni Ruperto Manuel a napili in absentia kas maysa a kameng ti board of trustees (director).

nota iti napasamak nga eleksion: wen, adda napasamak nga eleksion para iti baro nga ofisiales ti timpuyog. sagudayen daytoy ti annuroten nga intuyang ti securities and exchange commission nga isu pay laeng ti tungtungpalen ti tmi filipinas kas kabarbaro nga organisasion a kairerehistrona kas legal a gunglo iti s.e.c. (registration: CN200600571) kabayatan a maar-aramid ti kabukbukodan a bylaws ti timpuyog, nasurot pay laeng ti adda iti inted ti s.e.c. nga annuroten a nasken a tinawen ti pannakaangay ti pannakabutos ti 9 a kameng ti timpuyog a mangbukel iti board of trustees. kadagitoy a 9 a trustees, agbibinnotosda met no sino ti agbalin a presidente, bise, secretario, kdpy.

3 makuna:

idi 4:13 a. m., abril 16, 2006, Blogger ariel nakunana...

BRAVO!

 
idi 8:28 a. m., abril 16, 2006, Blogger joel nakunana...

Ne, dayta man ti kunkunak koma a mapasamak, adu a literary studies iti Iloko. No ikub koma ti literatura Ilokana, ditay pay nakaraykay ti rabaw ti pempen iti laksid ti kaadu ti nadukalen da Apo Yabes,da Manong A, Rosal, Tabin, Galam ken nagadun a nagthesis ken nagdisertasion maipapan iti daytoy. Daytoy a ti proyekto! Agbiag ti TMI!

 
idi 2:22 p. m., abril 17, 2006, Blogger ariel nakunana...

Encore,encore! Ket dikay agsardeng!

 

Publicar un comentario

<< Home