mannurat.com mannurat.com mannurat.com mannurat.com mannurat.com mannurat.com

mannurat.com 3/26/2006

idiay kano lallo ita a tawen, kagumilan

manipud iti damdamag ti bannawag (iti issue a marso 27, 2006):
Lit. Seminar-Worshop
ti GF, maangay iti Lallo


Maangay ti maika-38 a Literary Seminar-Workshop ti GUMIL Filipinas, ti gunglo dagiti mannurat nga Ilokano iti Filipinas ken ganggannaet a pagilian, iti Lallo High School, Centro, Lallo, Cagayan, iti Abril 21-22-23 babaen ti panangsangaili ti GUMIL Cagayan, kas impakaammo ni GF President Dionisio S. Bulong.

Kinuna ni D.S. Bulong a sakbayna, naipakaammo a maangay ti seminar-workshop iti Laoag CIty ngem nagsanud ti GUMIL Ilocos Noste (a mangsangaili koma iti semina-workshop) gapu iti kasasaad ti salun-at ti presidentena, ni Elizabeth Madarang-Raquel.

Innayonna a pagsayaatanna, siaayat ti GUMIL Cagayan nga idauluan ni Arthur P. Urata a nangallawat iti responsibilidad iti baet ti kaababa ti panawen ti GC nga agsagana.

Kas kinuna ti maysa pay nga adigi ti GC ken agdama a bise presidente ti GF, ni Bokal Vilmer V. Viloria, agsakripisioda tapno maisayangkat ti pasken, kinuna pay ti presidente ti GF.

Mainaig itoy, idawat ti liderato ti GUMIL CAgayan kadagiti kameng ti gungloda, nangruna iti GUMIL Gonzaga a kaaduan ti kameng, a tumulongda koma iti panggep.

"Ngem saan a kabaelan amin nga ibaklay ti grupomi dagiti rumbeng a maisagana kasta met ti pannakaimaton ti seminar-workshop. Tumulong koma met dagiti padami a provincial chapter, aglalo dagiti opisial ti GF tangay para iti amin ti pasken," kinuna da Viloria ken Urata.

Mangrugi ti rehistrasion iti alas tres iti malem iti Abril 21. Iti karabiyanna, maangay ti programa a pakapadayawan dagiti napili a Pedro Bucaneg Awardees, Leona Florentino Awardees, dagiti umawat iti Special Awards manipud iti GF, ken pakayawatan ti gunggona dagiti nangabak kadagiti salip iti panagsurat (iti 3rd Premio Andel, 2nd Sta. Raffaella Ilocano Community Literary Awards, 8th AMMA Foundation Literary Awards, 1st T. Gabriel Tugade Literary Awards, ken Reynald F. Antonio Awards for Iluko Literature).

Pormal a maluktan ti programa iti panagsarita dagiti sangaili a pakairamanan dagiti agsangaili nga opisial ti ili. Kalpasanna, marugian ti seminar-workshop.

Mabingay iti dua a grupo dagiti agseminar: maysa ti buklen dagiti agdadamo ken agngayangay a mannuray; maikadua ti grupo dagiti batido nga agsursurat. Lima met a sanga ti literatura ti mataming--ababa a sarita, daniw, salaysay, nobela, ken saribitniw. Dagiti maibilang a teddek ti Literatura Ilokana ti aglektiur.

Mainaig iti daytoy, maidagadag kadagiti makiseminar, aglalo kadagiti agdadamo ken agngayangay, a mangitugotda kadagiti sinuratda a ma-workshop. Nasaysayaat pay no adda sumagmamano a kopia ti sinuratda. Agtuloy ti workshop iti rabii. No nasken, maituloy pay iti kabigatanna, Abril 23.

Ni Ms. Djuna R. Alcantara, secretary general ti GF, ti mangidaulo iti pannakaimaton ti seminar-workshop.

Kas iti kallabes, P500 ti registration fee agraman dagiti senior members ti GF. Kuna ti GUMIL Cagayan nga ad-adalenda ti posibilidad a maikkan dagiti estudiante iti haiskul, aglalo dagiti agad-adal iti Lallo High School, iti nababbaba a registration fee.

Maipalagip met a saan a mangpili ti GF iti Miss GUMIL itoy a tawen. Maaramidto daytoy iti umay a tawen, kas kuna ti liderato ti GF.

addayta, idiay gayamen lallo ti paggugumilan. intayto, a, manen makigumil. pagsayaatanna ta maifocus san iti taltalaga a literary seminar-workshop ti nasao a pasken-mamannurat. sapay koma. ta dinto manen madismaya dagitay damona ti makadar-ay wenno agdadamo a mannurat a makunkuna. ta kadagiti kano napalpalabas a panaggugumil ket awan met ti nasursuroda kadagiti id-idoluenda a mamannurat a naglektiur. ta ad-adda kano met a polpolitiko ken polpolitika ti maar-aramid iti pasken.

ania ket kanon, lalo itay napalabas a gumilan idiay suso beach, ta kaim-imasan ti lecture iti panagsurat iti pangsalip a sarita ket bigla lattan nga adda ni imelda marcos ket ania pay, naisardeng ti napintas a lecture, pinagpupurokan a linawlaw ken sinursurot dagiti mannurat ni imelda, dakulap ditoy dakulap dita, ket uray la nabisbisinan dagiti delegado ta nasurok metten a dua nga oras a nagbitbitla ni imelda maipapan kadagiti marcoses ken ti nakapimpiman kano a kasasaad ken sasaadenda.

sapay koma ta saanen a maulit dagiti kakastoy a pagteng a mangisturbo iti panagadal dagiti mannurat. uray pay adda umay wenno maawis a politiko, adda koma orasna wenno mayeskediul ti panagparang wenno panagbitlana. wenno awan koman ti maaw-awis (no sinno ketdi, a, ti agaw-awis iti kas ken ni imelda marcos!) a polpolitiko a mangdadael iti oras dagiti mannurat. awanto met la ti serserbi dagitoy a politiko iti panagrang-ay ti gumil wenno iti idudur-as ti literatura nga iloko. bin-ig la a karkari iti tulong wenno ayuda ti inda itantanawtaw ket agtalinaed la a karkari met.

ti ketdi awisen a pepersonalidad, dagitay, a, koma met laeng mamannurat a nalatak ken maibilang a "higante" iti literatura. padasenyo nga awisen dagiti kas ken ni nailian nga artista iti literatura f. sionil jose, wenno ti posible a sumaruno a baro a national artist manen a ni bienvenido lumbera. wenno dagiti kas kada edith tiempo (a national artist met laeng), virgilio almario (national artist manen), jun cruz reyes, butch dalisay, lilia quindoza santiago, edgardo reyes, efren abueg kdpy a mabigbigbig iti philippine literature. dagitoy ti pagsaritaen (iti uray english wenno tagalog) ta kitaem no di uray agmalmalem-agpatpatnag ket agdengngeg dagiti delegado a didan madmadlaw ti bisindan!

kangrunaanna pay, sapay ta awanen ti mapasamak nga open a panagdidiskutir, panagpipinnabasol, panagaapa maipapan kadagiti internal nga issues wenno pakaseknan ti gumil filipinas, nangruna iti maipapan iti kuarta. nakababain man daytoy a banag. agaapa a mamannurat maigapu iti kuarta. masmasdaaw dagiti damona ti dumar-ay, dagiti sangaili, iti kastoy a maim-imatangan ken mangmangngegda no kua. dida a pulos ipagpagarup a kakastoy gayam kano ti galad ken galgaladen dagiti id-idoluenda a mamannurat. nakababain man ti kastoy. saan la adagiti maseknan nga agaapa a mamannurat ti maibabain ngem pati payen ti intero nga organisasion. saan koma met a kastoy, saanto koma metten a kastoy ti maaramiden.

ala, intayto 'diay lallo, kakagumilan!

2 makuna:

idi 3:15 p. m., marzo 27, 2006, Blogger jfi nakunana...

Bareng makapannak met, nabayagen nga kayat ko koma met ti makipagpartisipa ngem awan panawen. Ket tatta ta idiay cagayan ti pakaangayanna ket di met siguro narigat nga umayak bareng maasa ti namudel nga utekkon.

Addanak tu nga agbakbakasyon ken dayta nga aldaw.

Ta bareng diak ma-ekperiensa daguita nga nadakamat dita ngato.

 
idi 11:48 a. m., marzo 31, 2006, Anonymous jaime agpalo, jr nakunana...

ala ket naragsak a kombension a... bagik laengen iti umapal...itinto laengen sabali

 

Publicar un comentario en la entrada

<< Home