panitikan.com.ph

nasayaat ken napintas man daytoy kairuruarna a philippine literature website a panitikan.com.ph.
your portal to philippine literature kunana/kano met. ay, ket mayat man no adda met laengen kasla ofisial a portal iti literatura iti filipinas.

medio sinukisokko ti site. saan pay unay nga adu ti masarakan a pagsayaatan. ngem adu ti nasayaat a mabasa. adu ti naipablaak a daniw, sarita, salaysay.

kinitak met a dagus daytoy section kano ti "writing from the regions" ket lo, and behold! adda met nga agpayso sadiayen ti "ilocos region" wohooo! nagsayaat a banagen ta rehion ti ilocos pay ti nagbusat! ket ne, adda met dandaniw ti maysa a JOSE S.P. HIDALGO sadiay? jose? jose?? jose?! sinno daytoy itan a jose s.p. hidalgo a mannaniw a taga-ilocos region?

ania metten, apay nagbiddutda iti nagan ni apo JUAN S.P. HIDALGO, JR.!?

kinitak, binasak a saggaysa dagiti daniw ni ninong johnny (ninongmi ken baket iti kasar), ayna, ket isu la nga isu a "Jose S.P. Hidalgo" dagiti bylines, ania metten! napintas ketdi ta adda english a patarus ni ninong johnny. ken ti dadduma, adda patarus iti filipino (tagalog) ni mang ariel agcaoili. (adda footnotes dagiti daniw, no sadino nga immuna a naipablaak wenno naaramat. ket adda pay footnotes a nadakamat ti pudno ken kompleto a nagan ni apo juan s.p. hidalgo, jr., apay, namuttalengan ngata dagiti staff ti site, aya?)

kinitak pay manen ti section/link nga "organizations" ket, ne, nagsayaaten ta ti ketdin gumil filipinas ti umun-una a nailista! ngem idi basaek ti articulo, nagmalangaak ta mabigbigko la unay nga isu metten daytay inaramid/rinugiak nga articulo iti english wikipedia! ne, ket naragsakanak, a, met piman. ngem naldaanganak ta idi kitaek iti baba ti articulo, awan man laeng ti credito a naadaw wenno naggapu iti wikipedia daytoy. ania metten! annuroten ngamin iti wikipedia a nupay free, libre, gratis a maaramat dagiti articulo sadiay, nasken koma a maikkan iti credito ti wikipedia kas nagtaudan ti articulo. very basic daytoy iti ania man a research wenno paper. saan ngata nga ammo dagiti taga-panitikan.com.ph? ngem dadduma nga articulo sadiay, kas koma ti maipapan iti gunglo a kuting ket nadakamat met ti source ti articulo.

ala, bareng maaturto dagitoy a biddut wenno nagkamtudan daytoy a napintas a site maipapan iti panitikan ti filipinas.

ken sapay koma ta yad-aduda pay ti mairaman a putar dagiti mannurat nga ilokano ken mamannurat iti iloko. kasta metten a mairamanto koma a mailista sadiay ti nagan dagiti amin a mannurat nga ilokano.