mannurat.com mannurat.com mannurat.com mannurat.com mannurat.com mannurat.com

mannurat.com 11/20/2005

bassit-adu a kur-it, liblibro pay, kumikom kdpy

adu met koma ti kayatko nga ikur-it, ipanablaag. ngem makumikomak ngamin kadagitoy nga al-aldaw iti nagadu a pakasaknaran a diak pay ket ammon no rebbengna a pakasikoran.

ngem nalabit nasken ken kasapulan.

kadagiti napalabas nga al-aldaw ti naisibet a dua a lawas, nagrebrebiuak (nagbasabasa ken nagadal manen maipapan kadagiti pakarikutak iti computers, computer networks ken dadduma pay) ken nagexamak, ket addada met sumagmamano a naipasak, kadagiti certification exams ti brainbench.com. libre ngamin iti dua a lawas dagiti amin nga examda nga agbalor iti $49.99 ti maysa. promo, isu a ginundawayak manen ti nagexam, imbag la pangasaan manen iti aglatin nga ammo ken napia la a nayon dagiti lebben a certs. ken napateg la unay ngamin dagitoy a certificasion, nangruna iti linia ti obrak. paset ti kompetision. adu ngaminen dagiti pagobraan wenno employers a mangsapul no kua iti certified a tattao kadagiti obra wenno trabaho a pagaplayanda. di la ammo, amangan no maaramatkonto met dagitoy a certs iti masakbayan, a saan a tapno mapasingkedan lang nga adda pay met nabatbati nga ammo wenno skill.

maysa pay nakakumikoman/pakakumikoman datao ket daytoy panagipatarus.

panagipatarus manipud english a sao iti iloko ken/wenno tagalog. malaksid ngamin iti daytoy dakkel a projecto nga ilokano wikipedia, a no sadino ket kaaduanna a translation ti ad-adda a maobra (ta maysa a panggep ngarud ditoy ket maipatarus ti sibubukel nga english wikipedia kadagiti nadumaduma a pagsasao a pakairamanan ti iloko; wenno vice versa, manipud kadagiti nadumaduma a pagsasao, ipatarus iti english) , nagboluntario pay datao a mangipatarus iti iloko kadagiti documento ti gnu project, nangruna kadagiti lisensiana iti libre ken nawaya a software kas iti gpl ken gfdl (rugi pay la ketdi amin dagitoy, pangted pay la amin ket di ammo no kaano a maiwakas).

kasta met a nagboluntarioak kas translator iti google translation. madama ti pannakaipatpatrus latta ti tagalog interface ti google ket sadiay a makiparpartisiparak. ti imasna ta awan pay a nairaman ti iloko kas pangpatarus! ur-urayek pay laeng ti sungbat ti google no anamonganda ti panangidawatko a mairaman koma metten ti iloko.

***

libro? wen, a. libro latta ngarud. naimas a pagsasaritaan ket no liblibro. kasla 'tay maipinapaitan a liblibro kada tualtualia, hehe!

awan makukuarta ita a panawen, bassit la ti adda a maisalsalikad a gatad. isu a diak unay mapmapan iti yan dagiti ukay-ukay a libro.

ngem naminsan a naisagudak, adda dua nga innalak:

  • forrest gump ni winston groom (php30)
  • revolt in 2100 ni robert heinlein (hb, php29)

pirmi a naayatanak a nangbasa iti daytoy "forrest gump," agel-ellekak nga agmaymaysa iti kaltaang ti rabii. nabayagen a nabuyak ti peliculana daytoy ngem ad-adda a naray-awak iti novela ni groom. adu ngamin ti nagdumaan ken naggidiatan ti naipelicula ken ti orihinal a novela a naimaldit.

diak pay narugian daytoy sf ni heinlein. panggepko a leppasen pay dagiti pangtedko a herbert ken asimov sakonto padasen daytoy novela ni heinlein.

kabayatanna, adtoy met dagiti nagatangko babaen ti ebay.ph:

  • no one writes to the colonel and other stories ni gabriel garcia marquez (php69, maexpektarmo latta ti "magic realism" kadagitoy nga obra ni apong gabo, nangruna kadagiti sarita, kas koma iti "one day after saturday" ken ti "big mama's funeral." ngem ad-adda ketdi a social realism ti imbanat ni gabo iti ababa-a-novela a "no one writes to the colonel" kasta met kadagiti sarita a "tuesday siesta" ken "there are no thieves in this town")

  • the bonesetter's daughter ni amy tan (php71, padasek man met ti bumasa iti obra ti maysa chinese american nga autor; sumagmamano pay a la panid ti nabasak)

  • mass ni f. sionil jose (php75, adda kastoy a librokon, ngem innalak latta ta adda maymayat a sukat ti nabulbulod nga agpirpirpir a kopia; panggepko nga uliten a basaen ngamin daytoy nga obra ni apong frankie)

  • po-on ni f.sionil jose (php75, manen addan kastoy a librok ngem diak nasarkedan a di inorder ta nayon ti koleksion; panggepko a basaen ngamin manen ti "po-on" tapno koma matignayak a mangituloy kadagiti pangtedko a "historikal" met a sarsarita)
addayta... adda met la naipanablaag.



1 makuna:

idi 9:48 p. m., noviembre 29, 2005, Blogger act nakunana...

Ading Roy, kasano iti panaggatang idiay ebay.ph?

- Manang Aida

 

Publicar un comentario en la entrada

<< Home