libro pay: 4 f. sionil jose

adda manen kabarbaro a librok, yeheyyy! naragsakak no adda baro a libro a magatangko wenno madawatko ket. ngem ita naggastosak tapno maalak ti uppat kadagiti sigsigpek la unay a liblibro a mainayon iti koleksionko; mainayon a karemkemen, ngalngalen, nanamen ti arsab a raasko iti libro.

uppat manen daytoy a nayon ti urnongko nga obra ni f. sionil jose, a maysa kadagiti pagtamdak ken pagad-adalak a mannurat nga ilokano:

• ben singkol (p265)
  
• gagamba (P160)
  
• the god stealer and other short stories (p265)
  
• olvidon and other stories (p250)
  

baro amin a kopia dagita, fresh manipud iti powerbooks, ket napungkit manen 'tay urnong iti bolsito a kuarta piman. ngem badyet para libro a talaga, hehe, kasla pang-tuition fee met, a , book allowance datao iti agtultuloy, di malmalpas a panages-eskuelatayo iti panagsuratan.

nayon iti f. sionil jose collectionko. dagiti immuna a naalak a libro ni apong frankie ket ti rosales saga a makunkuna: "po-on," "tree," "my brother, my executioner," "the pretenders," ken "mass." awan ti baro kadagitoy ta bin-ig a segunda mano wenno tersera mano pay ket ngatan. immuna a naalak/nabasak daytoy "mass" nga impabulod laeng ti maysa a propesor (diak inagnagananen ta baka maammuanna nga adda kaniak ti librona ta diak met naisubsublin ta diak met nakitkitan, hehehe!). sa idi kuan in-inut a naalak kadagiti paglakuan ti ukay-ukay a libro ti dadduma.

idi kuan, nagatangko ti "waywaya: eleven filipino short stories," "viajero," ken "ermita."

adda pay sumagmamano a pagbusbosan ti pirak tapno makompletokton ti koleksionko iti fiction ni apong frankie: "sins," "puppy love and other short stories," "three filipino women." saanen ti "platinum" ta dagiti 10 a sarita ditoy ket nainayonen iti baro nga edition ti "olvidon" a nagatangko.

ken dagidiayto pay, a, ngata, international editions ti rosales saga, ti "dusk" ("po-on"), "don vicente," (napagtipon a "tree" ken "my brother, my executioner") ken "the samsons" (napagtipon a "the pretenders" ken "mass").

ipanablaagkonto ti bassit ken medio adunto pay ngata a masaok ken paliiwko kadagiti obra no apong frankie. ti laeng maipalgakko ita, maysa ni f. sionil jose kadagiti kadakkelan ti impluensiana kaniak iti panangtrattratok iti social realism iti bukodko a fiksion ken teoria iti literatura. raemek daydiay panangipakpakat ni jose iti bukodna nga estilo ti proletarian literature. mabalin a makagura dagiti hardcore a marxists ngem kunaek a maysa a marxista ni jose, saan a kas ideologue wenno cadre, ngem kas maysa a marxist artist. saan a kas maysa a guerilla a che guevara wenno eman lacaba ngem ketdi kasla maysa a pablo neruda.

kangrunaanna a pagtamedak unay ken ni f. sionil jose ket ti panangipateg ken panangbigbigna la unay iti kinailokanona ken ti kinailokano kenkuana kas maysa nga artist. nupay iti ingles nga agsursurat, nakail-ilokano dagiti obrana, kas ipaneknek ti rosales saga--kas ipaneknek ni istak, ni antonio samson, wenno uray ni pepe samson.

maysa kadagiti nakallalagip a padasko iti panagbasbasak iti rosales saga ket ti saga a mismo ni istak iti "po-on," ni eustaquio salvador, a naaddaan iti manmano a gundaway a makadennana iti biag ken patay ti dua a naindaklan a bannuar, da apolinario mabini ken ni gregorio del pilar. dakkel ken napigsa ti kidagna kaniak aglalo daydiay eksena a nakiraman a limmaban iti gubat ni del pilar iti tirad pass ni istak kontra kadagiti norte americanos a mangkamkamat ken ni aguinaldo. kasla agpaypayso a napasamak daytoy a senario, saan a fiksion laeng no di ket paset ti pakasaritaan a mismo.

iti panagkunak, kasdiay man ti pudpudno a historical fiction--'tay saanmo a dildillawen a naibasar iti history daytoy a fiksion ket kasla met la ngarud non-fiction narrative laeng kuntodo adda pay ketdin footnotesnan a kaslala maysa a scholarly a research wenno thesis/dissertation! panagkunak pay, kadagiti amateur nga agpadpadas (kas kadatao, ta adda met padpadasek iti agdama) nga agsurat iti fiksion a historikal, adalenda ti namnamay-an ni jose iti po-on, nangruna dagiti paset a naggunayan dagiti non-fictional a karakter a kas kada mabini ken del pilar. kasdiay koma met ti mapartuattayo iti fiksion nga iloko.

nayonakto daytoy a paliiw...