asemblea, conferencia

itoy masungad nga abril, dua a dadakkel a pasken wenno panagummong ti maangay iti biang dagiti mannurat nga ilokano ken/wenno mamannurat iti iloko.

inton abril 7 agingga 8, maangay ti umuna a nasional nga asemblea ti timpuyog dagiti mannurat iti iluko iti filipinas wenno tmi filipinas nga idauluan ni apo john b. buhay. maaramid daytoy sadiay farmers' training center ti nueva vizcaya state university (sigud a nueva vizcaya state institute of technology wenno nvsit) idiay bayombong, nueva vizcaya.

mairaman kadagiti aktibidades ti "rabii dagiti mannurat" (diak ammo pay no ania daytoy a "rabii", damagekto pay ken john, nalabit socialization?), ken mapangruna met a maangay ti "avant-garde a literary-seminar workshop a pakaitampokan dagiti kritiko iti literatura, bangolan nga editor ken premiado a mannurat iti Iluko kas panelista kadagiti lektiur iti panagsurat iti daniw, sarita ken salaysay."

iti sabali a bangir, inton abril 21 agingga 23, angayen met ti gumil filipinas ti tinawen a nailian a conferencia ken convensionna iti ciudad ti laoag, ilocos norte. saan pay a naiwaragawag no sadino ti pagconferenciaan ketdi. ipablaakkonto ditoy no maammuak.

itoy a conferencia, "malaksid iti maangay a seminar para kadagiti agdadamo ken beterano a mannurat iti ababa a sarita, daniw, salaysay, nobela, drama, saribitniw, ken desktop publishing, mapadayawanto pay dagiti nangabak a mannurat kadagiti nadumaduma a pasalip iti panagsurat."

ala, intayto, a, tumabunotayto man met kadagitoy a napapateg a pasken.