dabinsi kudkod da movie

ania la unayen, aya, ta pakasikoran ti dadduma daytoy pelicula a "the da vinci code."

"If Jesus Christ had a child and a wife, then Christianity would be destroyed."

dayta man ti imbatad ni thongchai pradabchananurat ti thailand protestant churches coordinating committee.

estupido a kapanunotan. makudkodko ti di nagatel a kibongkibongko kadagiti kakastoy a "nacoriteg a capanonotan."

kuna met ni malaysian bishop lim cheng ean: "If Christians know their own faith, they will be strong enough."

agpayso. no napudnoka a cristiano, apay ketdin a maapektaran ti pammatim?

dayawek met ti pamanunotan ti dadaulo ti bukodtayo a sensor, ni apo marissa laguardia (umiso la unay ti apeliedona a "guardia", ania?): "Thirty-six countries have already reviewed this film and they have not banned it. So are we just out of the Stone Age?"

diak la mamati a no ti maysa a napudno a cristiano wenno catolico ket no mabasa wenno mabuyana ti "the da vinci code" ket apektarannan ti pammatina ket saanen nga agbalin a deboto wenno manamati. ni cristo ket cristo latta, a. ni cristo ket isu latta ti mannubbot ken mangisalakan. ania koma ti diperensiana no agpayso man a nangasawa isuna? nakissayan kadi ti kinacristona wenno ti kinamannubotna? pagduaduaan kadi metten isuna nga amangan ta saantayon a maisalakan wenno masubbot babaen kenkuana gapu laeng ta inasawana ni maria magdalena?

maysa pay, awan met rekreklamoda idi rimmuar ti libro idi pay 2003. ket best seller pay la daytoy agingga itatta. riniwriwriwen a kopia ti nailako. riniwriwriw metten ti nakabasa ken mangbasbasa. ket ad-adda manen nga ag-best seller, a, ta kasta la unay met ti reaksion dagiti reaksionario. lallaloda la pinagsikat ni dan brown piman. ita, ipalpalastogen ni brown iti websitena a "the #1 worldwide phenomenon" ti obrana.

ket apay a di protestaen dagiti papadi, papastor ken dadduma pay a moralista wannabe nga agrekreklamo ti mismo a libo a kas iti panangprotestada iti versionna iti pelicula? apay a dida ukkonen dagiti lako a libro iti bookstores sada puoran iti plaza? apay a di ideklara dagiti maseknan a dadaulo ti simbaan a ma-excommunicate ti asinoman a kameng ti pammatida a manggatang, mangbasa, agikut iti obra a fiksion ni dan brown?

hmmm. basta kaniak, awan la ketdi ti makalapped iti innakto panangbuya iti pagsinean. itugotkonto pay ti familiak, dagiti annakko, tapno mabuyami. ngamin, gapu iti nagadu a protesta kada reaksion a rinugian dagiti mangkonkontra ket nagbalin daytoy a topiko a maulit-ulit a maipadpadamag ken madisdiskas iti media, pati ubbing ket curiousda la garuden no ania daytoy, aya, apay agpayso kano 'ya a nagasawa da cristo ken maria magdalena ken naganakda pay? intayto buyaen, kunak met. wenno no di man mapalubosan ti ubbing iti pagsinean, gumatangakto iti dvd ti movie ta buyaentayo, ubbing. dagiti pay annakko ket immaladan sa kaniak a managbasa ken managbuya iti sine, hehehe. no nabuyadanto payen iti dvd ti pelicula a "the last temptation of christ" daytanto la ketdin dabdabinsi kudkod? awan, a.