mannurat.com mannurat.com mannurat.com mannurat.com mannurat.com mannurat.com

mannurat.com 5/29/2006

daan a ververso 2

adtoy pay ti dua a set ti textos, manipud "rissik":


DUGGONG

Nagmaga a buteg
Timmangken a plema
A kimpet kadagiti urmot
Ni agong.
Wen, siak ni duggong
A dimo naipangres
A dimo naisagkak.

Dudumen a nakasuksok
Dildilpatan ni angesmo
Ipastrekmo ni kikit
Kautennak, regkasennak
Kadagiti urmot ni agong
Dudumen a nakasuksok
Kadurmennak, ibellengnak
Ipuligadnak, punasennak
Wen, siak ni duggong
Dildilpatan ni angesmo.

Ipastrekmo ni kikit
Kautennak, regkasennak
Kadurmennak, ibellengnak
Nagmaga a buteg
Timmangken a plema
A dimo impangres
A dimo insagkak
Dudumen a nakasuksok
Kimpet kadagiti urmot
Ni agongmo.

Ipastrekmo ni kikit
Wen, siak ni duggongmo
Ipuligadnak, kadurmennak.
Ngem siak ni duggongmo
Agmaga a butegmo
Tumangken a plemam
A dimo maipangres
A dimo maisagkak
Duduomem a maisuksok
Dilpatan ni angesmo.

Wen, siak ni duggong.

Duggongmo.


1994




CALLAO CAVES, PEÑABLANCA, CAGAYAN, FEBRERO 21, 1995:
ESSEM A DI KALIPATAN: DATON-LAGIP, LAGIP-DATON


The Ca1lao Caves which bear the handprint af God, are Cagayan's priceless patrimony. As now fully developed, these caves will endure a hundred millenia to remind the world of Cagayano's love for nature and beauty.
         -- buddak-gambang iti sungaban ti Callao Caves


ar-arak ti agsublisubli a lagip ti daton
a malanga: ti lipat a saligemgemen ti apon
ti umsiag a danapidip ken maltiing nga aron
ti keppet ti dam-eg stalactites ken limestone

a katedral, altar ti no mano nga arasaas
kadagiti pitak a chamber1 ti sipnget ken lawag
a patay-gangat ti bitek ti salog ken sang-at
sangkagukayaban a rikna ti idi, ita, bigat

ingga't agnanayon ken ingga't daan ti daan.
adda kadi ngata pumalta, adda kadi maamlingan
iti pukaw-lagip iti historiat' kanawan
ken kanigid ti mutia a tiniliw, inikutan?

engkanto iti karayan ken angep ken arbis
ti quibal, peñablanca2 a daywen dagiti sam-it
a medmed. tagiruot ti angdod-panniki ken anit-it
sallapingaw a di agpabatubat, ikkis nga ikkis

kadagiti pitak a taeng iti bobeda ti lubong.
di ammo, di maawatan ti adda iti puso ti libsong.
di maawatan, kasta met, ti adda iti isip ti tubong.
di ammo, kasta pay, ti adda iti ulimek a tumibong,

agallangugan iti kueba ti turong, maikitikit
met kadagiti bandalismo iti bakrang: ti kikit
ti intero a nakaparsuaan: adda agsangit
adda agrag-o: kangrunaanna: adda ketdi manglagip.



1Ti Callao Caves ket napasetpaset, bayat ti panagpaunegna, iti pito a chamber. Masarakan iti second chamber ti chapel ken altar.

2Masarakan ti Callao Caves iti Brgy. Quibal, Peñablanca, Cagayan, agarup 24 a kilometro manipud Tuguegarao, Cagayan.



1995