mannurat.com mannurat.com mannurat.com mannurat.com mannurat.com mannurat.com

mannurat.com 6/04/2006

daan a ververso 3

adtoy pay ti dua a vintage 1990s a ververso manipud iti "rissik":


SAAN MET NGAMIN

ngem saan met ngamin
a ti utek ket kas iti puso koma
a rikna la a rikna
iti ayat wenno gura wenno limdo
ken ania pay. ngem panunot
ketdi a panunot iti ayat wenno
gura wenno limdo ken ania pay.
ket agderrep latta adu nga isip, adu a konsensia.

ket saan met ngamin
a ti puso ket kas iti buto koma
a no umtog ket uki ti kayatna
a sublisublian a pagaponan
tapno pagungganna malpaag. ngem
rikna ketdi a rikna, awan patingga
di umlay, kinod a kinod bitekna.
ket agparuar latta adu a dara, adu a rikna.

saan met ngamin
a ti buto ket kas iti agong koma
a no makaangot iti bangsit
ti anglit ti sip-ang wenno angpep ti uki
ket dagus a paapput. ngem ketdi
kaykayatenna, bangbanglona ti pay-ud
di nagkawkaw man wenno naangri
a balasang, basta balasang uray nalasang, basta naguki.
ket agtupra latta adu a daga, adu a ngatangata.

saan met ngamin
a ti utek ket puso
a ti puso ket buto
a ti buto ket agong.

ngem adda utek ti buto.
adda puso ti utek.
adda buto ti puso.
adda agong ti utek.
adda puso ti buto.
adda buto ti agong.
adda agong ti puso.
adda utek ti agong.
adda buto ti utek.
adda puso ti agong.
adda utek ti puso.
adda agong ti buto.

1994


EKIS

"Anong paki mo sa long hair ko?
Inggit ka lang, kasi, ikaw nakakalbo!"
        -- Listen To Long Hair, WEEDD

"Hindi niyo kami mabibilang
At hindi rin maikakahon."
        -- Awit Ng Kabataan, RIVERMAYA


Ellayen 'ta ripirip
Din no kua makapigitpigit
Iti kurdit lti linnukditan kur-it.
Din no kua tumangar 'ta sirip
Din makaapros, din makaimaldit iti uray
La koma flying kiss
Kadagti naglalapana, nagseseksi nga ekis.
Maisbuanen idda pati labay.
Matakkianen sapin agraman kagay.
Uray kamalaaen 'ta panunot
Karissabong a rason, karamukom
A saludsod ti ita nga isip, din agsikog iti singin
A kinapudno ken suni a sungbat.
Di koma ngaminen gamden 'ta rikna a darumog
Ti makitinnurayok.
Di koman arep-epen a yoten
'Ta mutektek ti dina mautek.
Din no kua pigilen
Ti trip ti sublat ti marabuteg
Nga aglagtit, uray agsarabagtit
Kadagiti sabado nights nga agbulos ti imas ti kurdit
Iti lailo dagiti naglalapana, nagseseksi nga ekis.

1995


2 makuna:

idi 8:54 a. m., junio 05, 2006, Blogger jfi nakunana...

Kabsat nabasak daytoy idiay BURNAY. Damagek laeng koma no apay a naisardengen daytoy E-ZINE.

 
idi 2:24 p. m., junio 05, 2006, Blogger rva nakunana...

"defunct" met ngaminen ti burnay e-zine. nabaybay-anmi kadagiti kakaduak. diak metten nasangsango nga itultuloy.

ngem addanto panawen nga ituloyko manen daydiay. pasetto siguro ti planok a literary portal iti masakbayan. agur-urnongak pay ngamin iti gastosen a gundaway ken kuarta a pangfundo. panggeko nga addanto kabukbukodanna a domain ken webhosting.

agyamanak iti appreciationmo kadagitoy a verso, jake.

 

Publicar un comentario en la entrada

<< Home