'tay pinakbet ni inangko

(nabayag a nakadraft iti blagko daytoyen... man ta ituloykon nga ipanablaag.)

il-iliwek dagiti luto ni inangko. aglalo no inabraw, dinengdeng, pinakbet. diak ngamin kadendenna ni inangko ta addakami ditoy tuguegarao a sangafamiliaan ket adda met ni inangko sadiay nueva vizcaya. itay diciembre, immay ni inangko ditoy tuguegarao. isut' naglutluto iti natnateng a masida. adda daytay nakairuaman a raman ken textura ti dinengdeng a kaykayatak ken sapsapulek a ni laeng inangko piman ti makaaramid. nga isu met ti innak no kua padpadasen a tuladen no daytay magagetak nga agabraw wenno agpakbet. isu ita daytoy a pinakbet 'tay pakbet ken panagpakpakbet ni inangko.

simple laeng nga agpakbet ni inangko, awan adu nga ado (not much ado) a kas kaniak no dadduma. saanna nga igisgisa. dina pay ket sagsagpawan, a, iti ania a panagpaw a karne wenno ikan, basta puro a tarong, paria, okra, kamatis. sa laya ken sibuyas. no nagbureken 'tay danum iti tayab, mamguongen. pabukenna manen bassit sananton paggigiddanen nga ipisok amin ti nagalgalip a kamatis (ad-adu a kamatis, naim-imas, ngem tapno saan a naalsem unay ikkaten dagiti bukel ti kamatis) ken sibuyas ken nataltal a laya, tarong, paria ken okra. no kua laokanna met iti sili, bukel ti patani wenno kardis wenno naganus nga utong, wenno parda, wenno pallang. mayaten. simple, di kadi? (dayta pinakbet ni inangko, ladawan dita ngato, ket linaokanna iti pallang. sa ti naaramat a paria ket dagitay immarantiddog.)