nai-kwf06

Tinnagbat

I am as lovely as a dream in stone
                                   --Charles Baudelaire

Stone is a forehead where dreams grieve
                                   --Federico Garcia Lorca

agtaraok ti naluom nga oras
iti panagbanatabat ti akindaya a darammuangan.
intagbatmo iti bato ti kusilap ken mirduot
ti nakutoran nga agsapa
a sumalsalipengpeng iti lagip.

agmurmurmuray ti napuyatan a tagainep
a nagur-uray iti isem.

intuloyko ti nagna iti desdes ti nabigatan a mukat.
nasabatka ngem liniklikannak.
saludsodek koma ti naganmo, ngem kumuskusilap
met dagiti katuday iti igid ti nabato a dalan. sinippitnak
pay ti tarumamis ti inar-artiokak a bainbain, induririna ti siitna
idi kineppetko dagiti kalseb a bulongna. sipapalubos
ketdi a nangidaya iti nakamulagat a sabongna, idi kettelek
sako inammimian: ammokon ti naganmo.
ngem nakaadayokan, nakabaksilkan, dinakan
makamakam ti ikamatko koma a dallang .

aggidgidigid ti ulimek iti limmakasa
a natay a bato iti teppang ti dalan.

dinak la kadi, aya, kaasian?
ib-ibusennak iti babassit a pannakaibus
ti lagip nga intagbatko met laeng iti bato: in-inut
a pannakarupsa daytoy, kas 'tay kimpet a buot,
wenno lati, a nakaul-ulimek a mangkutkutim, mangrunrunot.

nausawanen ti tagainep
ngem di sinangpetan ti nakem.

bay-am, bay-am ngarud a mapasagak iti rabaw ti dulang
a tagtagainepek ti sabor ti dinengdeng a rabong ken saluyot.
bay-am nga autopsiaennak 'ta lunodmo
tapnon maammuan a sinabidongan 'ta paidammo
'toy bimtak nga apro ken nagsatan a puso.
bay-am nga ilungonnak 'ta kusilap.
pandagamto lattan iti nabiag a bato
ti gumuyguyab a tanemko.

agnakemto ti mabigatan a lagip inton inka matagtagainep
ti panagdisso ti nagpalangit a bato.

mannagainep

Ti Proseso Ti Tagainep

"ti makaturog, makamukat..."

agsuyaab ti dapanko no kasta nga agtuglep ti imak.
ngem ti ridep maikankanaw iti timba a pagub-ubuan
ti nadadael a gripo, saan a makaturog ti dakulapko.
saan nga agpakaturog ti mukatko a kas iti naparamanan nga alukap.
saan nga agpakaturog dagiti kiremkiremko a kas kadagiti pusa
iti atep nga agkinkinarinio, agkinkinnamat, agrinrinnukod
iti kaatiddog ti rabiida, agpinpinnasugnod
iti panaguttog, am-ammusayanda ti agek ti kabus
iti kioti ket garit a dutdot.

ti kabus, tagtagainepek a kankanayon ti kabus.
uray no tengtengnga't aldaw nga agtuglep ti tammudok,
ti dilpat ti nakabullad a bulan ti adda iti ulok.
kasla isbo ti ubing a mangbukel iti tapok a pariok, sumken
dagiti kampay-idi: agbalinak a lampin, siak daydi nangbungon
iti siak met laeng idi maipasngayak, nangbegket
iti adu a takki, isbo ken birua ti kinasiak. siak pay
ti aglatlati a lansa a nangrud-ak iti dapanko idi siamko,
siak daydiay, iti darepdepko, nangyubo
iti adu a dara, nangawis iti adu a kagaw, nangyeg
iti adu a nana: agkeggang met ti gaddil ti tagainep, aggagatel
daytoy, naimas a kudkudkoden iti panawen ti panagtutuglep.

kastoy no tagtagainepek ti panagbisinko iti mukat:
naibusen ti kape. kinuton ti asukar iti di narikpan a garapon.
ngem nasken ti panagkape ita ti dapan ken imak
ta makipagpuyatak iti massayag dagiti buteg ken luak.
buyatak ngarud iti napudot a danum ti garapon ti kape.
pampagek ti garapon ti asukar, animalkayo a kuton, panaw!
ikanawko iti nabessag a kape ti asukar a kakutkuton.
anusak nga alawen nga iwarsi dagiti tumpaw
a bangkay ti kuton. naimas latta nga igupen, basta kape,
agkurang man iti pait, sam-it. naimas daytoy
a pangtaraken iti turog kalpasan ti massayag. naimas
ita daytoy a pannakairidep iti kepkep ti sipnget.
naimasto a pannakalukag inton agtaraok, pot-pot-pot-pot,
dagiti pandesal. naimasto a panaginat inton
agmulumog, glurrggg glurrggg bwalkkss, ti maipabpaburek
a kape, ken inton aggarikgik, krssst krsstt, ti maipiprito
a daing. naimasto a panagriing. naimasto
a panagmurmuray.

tagtagainepekto pay lattan uray al-aldaw
ti estreliado nga itlog.


Nai-BANNAWAG ti maysa a version daytoy a daniw, iti bilang nga Agosto 14, 2006

nangabak, naabak, congrats!

congratulations kadagiti kakadua ken kakabsat a mannurat a nangabak kadagiti kalleppas a pasalip iti panagsuratan ita a tawen! ken congrats pay met latta, a, kadagiti pada a naabak. saan laeng met a ti maysa a nangabak ti rebbengna a kablaawan ken padayawan, di kadi? ta amin met agpapada a nakisalisal, nakibalubal, nakisinnait, nakilaban, nakidangadang. daydiay bael a nakisali, tured a nakisingit iti dinnayo ti kur-itan, panagtalek iti kabaelan, talged-rikna iti talugading ti pluma, dakkelen a pakapadayawan ken pakakablaawan, naabak man, nangabak man.

dagiti nangabak iti salip iti sarita ken daniw iti iloko nga intuyang ti komisyon sa wikang filipino:

daniw:
Umuna: Aurelio S. Agcaoili
Maika-2: Prudencio G. Padios
Maika-3: Reynaldo A. Duque
Maika-4: Benjamin Pacris
Maika-5: Ariel S. Tabag
Maika-6: Edilberto H. Angco

sarita:
Umuna: Jovito F. Amorin
Maika-2: Ariel S. Tabag
Maika-3: Federico T. Ilac
Maika-4: Jaime Raras
Maika-5: Jake F. Ilac
Maika-6: Prescillano N. Bermudez

dagiti nangabak iti iloko division ti palanca awards iti 2006:

Umuna: Bernardo D. Tabbada
Maika-2: Danilo B. Antalan
Maika-3: Arnold Pascual Jose

sumagmamano a ladawan-palanca (courtesy of prof. jimmy raras ken mang cles rambaud):

ni arnold "miks" jose idi awatenna ti premiona.

ni danny antalan, iti panangawatna
iti maikadua a palancana iti
nagsaruno a dua a tawen.