iloko firefox

ulitek man nga ipanablaag ditoy daytoy (immuna nga imblagko iti geekmannurat):

kitaenyo man daytoy:

(iklik ti imahen para iti dakdakkel a buya)

nagmayat, di kadi? agasem ta iloko ti interfacena a browser!

isu daytoy ti iloko a firefox, maysa kadagiti projecto a localisasion (pannakaipatarus kadagiti local a lengguahe) ti mozilla foundation nga akinpartuat iti nakalatlatak a browser a firefox. ni kabsat a joseph maza, maysa a patneng nga ilokano a programmer a nakabase iti seattle, washington ti nangirusat iti daytoy a pannaka-localize kadagiti pagsasao iti filipinas kadagiti projecto ti mozilla foundation (firefox, thunderbird, mozilla suite). saan la nga iti iloko ketdi ti ob-obraen ni joe, pati tagalog a mozilla ket maysa met isuna kadagiti mangigangganetget.

adda met sangkabassit a naiburaymi (-mi kunak ta adda kakaduak) a saranay kadaytoy iloko a firefox ta inkamang ni joe ti gannuatna iti forum ti ilocano.org ket sadiay a nagisingasingkami kadagiti patarus iti nadumaduma a balikas ken texto ti firefox interface.

no kayatyo a padasen daytoy iloko a firefox, downloadenyo ti iloko ui extension. kitaen ditoy ti instruction no kasano a patarayen ti iloko firefox.

makaparagsak man dagitoy a mapaspasamak iti kinnompiuteran ken innenternetan nga ilokano ken iloko. ad-adda a maitantandudo ken maitangtangsit ti iloko babaen kadagitoy a gannuat ken sayangkat.

ket nagimas man nga usaren daytoy iloko a firefox nangruna no iloko met laeng dagiti website nga iba-browsemo! nagmayat a kapartner piman ti ilokano wikipedia. wenno dagiti pagpanablaagantayo nga iloko.

ala ngarud, ket itultuloytay' latta nga itampok ti kinailokanotayo. abrasaentay' ti bagbagitayo wenno dagita kaabayyo nga ilokano dita kas nabara a panangkablaaw ken ni ilokano ken iti pagsasaotay' a samtoy.

ilokano wikipedia

kamaudiananna, kalpasan ti adu met a gundaway ken panawen a pinalabas ken panagur-uray, panagaripapa ken panagduadua, simngay met laeng ti tiansa a mabangonen, finally, daytoy nabayagen a planplanuenmi (kadagiti kakadua nga ilokano iti wikipedia.org) a pannakabuangay ti kabukbukodan a wikipedia nga iloko wenno ilokano.

iparang ken yam-ammok ngarud ita daytoy projecto nga ilokano wikipedia, ti iloko ken ilokano a wikipedia.

nabayagen nga adda tagalog wikipedia. adda metten cebuano wikipedia. sa idi kuan kapampangan wikipedia. sa idi kua manen waray wikipedia. sa addanto manen kinaray-a wikipedia. ket apay nga awan ti ilokano wikipedia?

adu a banag ti makagapu. ngem saankon nga ilatak pay ditoy dagiti detalye no apay a naitantantan daytoy a projecto.

ti ketdi napateg, addan ti ilokano wikipedia. ket adtoy, awisenkayo amin, appo a kakabsat, kakadua, gagayyem nga ilokano, managilokano, umiilokano, umiiloko, managiloko, mangipatpateg ken mangsalsaluad ken mangsalsalimetmet iti ilokano, iloko ken kinailokano, awisendakayo amin a makitinnulong iti daytoy a dakkel a projecto nga aggandat a mangaramid iti iloko/ilokano nga ensiklopedia!

wen, makuna a dakkel a projecto daytoy a kas iti english wikipedia ken dadduma pay a wikipedia kadagiti mayor a pagsasao iti lubong. maysa nga agtultuloy a projecto a saan nga ammo no kaano a malpas. ta saan met nga agsarday ngamin ti panagadda ti adu ken umad-adu nga impormasion manipud man iti napalabas, agdama ken uray masakbayan, a nasken a mailebben itoy nga ensiklopedia. ket iti kaso ti ilokano wikipedia, madama pay laeng ti pannakaipaspasdek dagiti makuna a pundasion wenno panuli a panidna nupay adu met bassiten dagiti narugian nga articulo. narigat ken narikut a pakakumikoman aglalo ta saan met amin a panawen ket maigubet iti daytoy ta amin dagiti wikipedians sadiay a pakairamanan 'toy numo ket voluntario laeng a tumultulong ket inda laeng isiksiki ti makiwikipedia iti libre nga orasda.

ngem latta, awisenkayo a makitinnulong iti daytoy a nawaya wenno lukat a project. nawaya, lukat, kunak man ta uray asino ket mabalinna ti makitinnulong. masapultay' ti adu a kakadua ken volunteers nga agsurat, agpartuat, agipatarus iti nainsiklopediaan nga articulo.

urayendakayo sadiay, apo!

ebay, ken libro manen, a

sabali manen ti nasumok datao. daytoy ebay. ti kadakkelan ken kasikatan a pagtagilakuan ti wagwag wenno ukay-ukay iti internet. rinibribu a tattao ken minilmilion a transaksion ti mapaspasamak iti ebay iti inaldaw. adun ti bimmakbaknang met gapu iti panagnegosioda iti ebay. ta no nalaingka, natusoka, nasikap nga ebayer, nalaka (kano) a pagakupan iti pirak daytoy ebay. ket natural, bilionario metten, a, ti nangirugi iti ebay, ni pierre omidyar. maidasig isuna kadagiti nalalaing ken nagagasat a pinarsua a nakapanunot iti karkarna wenno naidumduma a teknolohia iti internet, kas koma kadagiti nangpundar iti yahoo!, da david filo and jerry yang; wenno dagiti nangimbento iti google, da sergey brin ken larry page; wenno ti nangirugi iti amazon.com, ni jeff bezos.

wen, adu ti adik (kanon) iti ebay. ta malaksid a no nalaingka iti pasikotsikot ti internet business wenno online commerce (wenno e-commerce) ket medio umadut' makukuartam, sabali pay daytay feeling ti maki-bid, makitinnawar, makipinnangatuan iti presio iti kayatmo a gatangen--a kayat met a gatangen ti ad-adu pay. adda thrillna daydiay (kunaek man ta napadasakon itay laeng nabiit, hehehe!) ket nakagangganas man ti riknam no sika ti mangabak kas highest bidder ket na-outbid dagiti dadduma nga agkalikagum iti pagiinnagawanyo nga item.

iti ebay ngamin, ti la adda ti mabalin nga ilako ken magatang (ngem adda ketdi dagiti bawal nga item, kas koma iti igam wenno bala, nazi a bambanag, namureng a pagan-anay, bangkay, wenno tabako, [wen, bawal ti tabako a tagilako iti ebay!] kdpy.) ngem ammoyo, no ania ti mapanunot ditan a mayat nga ilako, kastat' kasariwawek ti nainnegosioan a panagut-utek ti dadduma nga ebayer, ta adda pay dagiti naglako iti kinabirhen (ti maysa a babai), submarino, tangke ken eroplano a pakigubat, aircraft carrier, tostado a tinapay nga adda nagmarka nga imahen kano ni virgin mary, gatas ti ina (a tao), picture ti nobia/nobio ken no ania la ditan! ti imasna ta addada met no kua ag-bid ken gumatang! isu a nakaay-ayat ti maki-ebay, kunam sa! sabali daytoy a padas ken pannakilangen iti naisalumina ken no kua ket weird nga internet culture.

anyways, anyways, saanak pay met ketdi nga addicted a mannaki-ebay a pinarsua, a. kinapudnona kadagitoy la a nasangok daytoy a banag nupay medio nabayagen a nagrehistroak/nagkamengak (kas buyer/seller) iti ebay. ken saanak pay a makirinrinnamas iti international nga ebay (ebay.com) ngem ketdi iti pay laeng local nga ebay iti filipinas, ti ebay.ph a nabiit pay a naluktan. ditoy ebay.ph, bin-ig pay laeng a pinoy dagiti bidder, buyer ken seller ket iti pay laeng uneg ti filipinas ti pakaang-angayan ti transaksion. nupay no kamengkan ti ebay.ph ket automatik metten a memberka iti ebay international. adu ti nagmamayat ken naglalaka a tagilako iti ebay international ngem ti pagdaksanna, nangina ti shipping rate ta bayadam ti pananakaipatulod ti gatangem nga item manipud iti sabali a nasion a lokasion ti tao a paggatangam. sa parikut pay iti panagbayadan. masapul nga adda credit cardmo wenno accountmo iti paypal (awan pay met ngarud paypal iti filipinas).

nagdamdamuak ti nag-bid ken naggatang iti libro iti ebay.ph. ania koma ngarud met ti sabali a magatang no di libro ta isut nalaka, hehe! addan tallo a libro a nagatangko babaen ti ebay. simmangpeten 'tay dua, padpadaanak ti maikatlo. taga-manila ngamin dagiti seller. bayadak babaen ti banko wenno g-cash, ipatulodda babaen ti courier service (lbc, 2go, air21, dhl wenno fedex). nasayaat koma no addaak manila ta ti gagangay a panangideliverda ket babaen ti panangyawat a mismo iti item, agkitakayo iti mall kas pagarigan.

ket aniada ngay dagiti damo a naganabko iti ebay?

dagitay man laeng nabayagen a sapsapulek a libro piman. dagitoy dua nga immuna a napasangpet: eva luna ni isabel allende ken dona flor and her two husbands ni jorge amado man laeng, julie! ti maikatlo, isu ti the stories of eva luna ni allende met laeng. nakaro ti panagpagus kadagitoy a tiempo kadagiti latino american ken español nga autor, ken iti magic realism. nangrugi daytoy idi inugmokak ti one hundred years of solitude ni gabriel garcia marquez ken dagiti obra da pablo neruda, federico garcia lorca, gabriela mistral, mario vargas llosa, carlos fuentes kdpy ken idi maiwakasko ti dua a nobela ni allende, ti the house of spirits ken ti daughter of fortune.

hmm, dakkel la ketdi ti impluensada manen kaniak dagitoy a panagbasa ken panagadal no ipamaysak manen ti agsurat, ngata. addada bukbuklek a bin-i ti sarsarita ken mabalin a novela pay a mabalin a sangalek ken ramenak met iti magic realism. ti ngamin ganasna iti magic realism, lalo iti estilo dagiti latino americano a fiksionista, mapaglalaokda ti kasla fantasia, humor, history, satire, ken social realism iti maysa nga obra. saan a bin-ig wenno puro a social realism laeng, kas koma kadagiti novela ni f. sionil jose. saan met a bin-ig wenno puro a satire wenno humor laeng a kas koma kadagiti novela ni jun cruz reyes.

bareng no addanto naan-anay a panawenkon a mangitugaw nga agsurat ta padasek a tratuen dagiti saritak iti kastoy a panangisurat ken panagsurat. bareng man no ti umunanto a serioso a masuratko a novela ket naramenan iti magic realism iti estilo dagiti latino americanos. awan sa pay ketdi ti fiksion iti iloko a kastoy? diak ammo, awan pay nabasak wenno awan malagipko a nabasakon. daydiay dangadang a novela ni mang ariel agcaoili, ibilangko a social realist a historikal a fiksion a naramenan iti magic realism a nakail-iloko. ngem saan met nga iloko a novela no di ket filipino ngamin, hehehe!