hp6

ahem, inton bigat kanon (julio 16) ti pannakairuar-pannakaiwaras-pannakailako ti nabayagen a padpadaanan unay-unay a libro.

wen, libro. nakakaskasdaaw ta intero a sangalubongan ti mangur-uray piman iti iruruar daytoy a libro. ket ne, sequel daytoy a libro iti series. mapadpadaanan a kas kadagiti immun-una a books iti series, nangruna ti sarunuenna daytoy a libro ita a rummuar no bigat. kas man la sequel iti sikat a pelicula, kasla episode III ti star wars wenno part 2 ti spider-man wenno matrix reloaded ken matrix revolutions.

isu daytoy ti "harry potter and the half-blood prince" a maika-6 a libro iti series ti pito kano a libro a harry potter ni j. k. rowling.

idi damo a rumuar ti harry potter books, ti book 1 a "harry potter and the sorcerer's stone" ken ti book 2 a "harry potter and the chamber of secrets," diak a pinampansin ta ania koma met, awan panawenko nga agbasa iti atiddog a novela a para ubbing, kunkunak, ileppasko laengen, a, dagiti nagadu a pangtedko pay a novela da hemingway, faulkner, marquez, eco, coello, kdpy a nabaybay-akon a libro. saak la nagbalaw iti rummuaren ti book 3 a "harry potter and the prisoner of azkaban" ta pagdamandamagan idin daytoy a publishing phenomenon that took the world by storm kano (agasem met ta riniwriwriw a kopia ti nailako ken mailaklako iti agarup amin a major languages iti lubong). gimmatangak a dagus iti paperback editions ti tallo a libro ket inugmokak ida. ayna, nakakaskasdaaw a talaga ta diak pay ketdi kayat nga ibbatanen, diak pay kayat ti mangan koman no mabalbalin ta kayatko nga ileppas a dagus dagiti libro! awan sa pay makalawas a nalpasko dagiti tallo a libro. kasta met ti maikapat, "harry potter and the goblet of fire." ti maikalima, nabayag a napadpadaanan ta naabotna ti agarup tallo a tawen sa inruar ni rowling, ti "harry potter and the order of the phoenix." (umarngi daytoy a pikapik ken regget idi binasak dagiti obra ni dan brown a "the da vinci code" ken "angels and demons" a saggatlo nga aldaw sa la ti pinangalunosko kadagitoy a dua a novela!)

sa ita, daytoy maikanem, "harry potter and the half-blood prince," kalpasan ti dua a tawen a panaguray.

pakagatangan, aya, ngata iti kopia no bigat? wenno pakadownloadan ngata? hehe!

sinno ngata daytoy a half-blood prince, aya? apay met a half-blood a di ket full-blooded koma a wizard? sinno ngata ti muggle a tatang wenno nanangna? saan la ketdi a ni harry daytoy a prinsipe ta full-blood a wizard ni harry. saan kano met a ni lord voldemort a mismo. saan kano met a ni tom riddle. hmm...

anian, aya, ti gasgasat ti writer a kas ken ni rowling. bilionario itan gapu ken ni harry potter. ngem saan met a kalakala a nagballigi ni rowling ta adu a rigat ti napasaranna sakbay a napagasatan. idi ilaklakona ti manuskrito ti umuna a libro, nireject dagiti dadakkel a publishing houses piman. iti uppapay ken suronna, dandanina la kanon payen impuor ti manuskrito dinumona ta agpakarigat idi a mangpadpadakkel iti bassit pay nga anakna (ta nagsinada iti immuna nga asawana). idi kuan, adda maysa a bassit a publishing company (isu ti bloomsbury) a nangpadas a nangipablaak iti "harry potter and the sorcerer's stone". and the rest is history a kunada.

awan la ngata, aya, met ti ilokano a mannurat, filipino a mannurat a makabael iti kas iti abilidad ni rowling? panagkunak, no abilidad wenno talento, adu ti makabael iti filipinas. parikut laeng ti market wenno pagipablaakan. kangrunaan ngamin a problema ni mannurat a pinoy iti filipinas ket ti banag a saan a managbasa dagiti filipino. isu a dagiti mannurat, kaaduanna latta ti mamirmiraut ken mangurkuranges piman.

a, ngem, inton kuan dagita a sentimiento de asukal a kunada. please do not spoil my excitement a makabasa iti "harry potter and the half-blood prince," sika met! agsarakak man pay ketdi iti web baka adda nayaw-awan nga authentic a kopiana (wen, a, ta agkaiwara metten iti internet dagiti fake a "harry potter" wenno fan fiction a sinirat dagiti harry potter fanatic!).

expecto patronummm! (pasensian, adda ngamin nadlawko a dementor nga umas-assibay! sika kad' daydiay?)