makaungeten ni ma'am! hello?

(diak masarkedan iti agikur-it kadagiti paliiwko iti agdama a moromoro ti politica iti piman nga ilitayo. this is hisroty in the making a kunada. agsasagadsad dagiti pagteng...)

adda manen ispits ni gloria. itattan, madlaw a makaungeten. saan a kas iti naudi nga ispitsna a kasla agpakpakaasi nga arinsangiten.

itan, impakdaarna a sitatalek: "I am not resigning my office."

ketdi, ti inna pinaglusulos ket ti intero a gabinetena: "I am asking my entire Cabinet to tender their resignation in order to give the Executive a free hand to reorganize itself."

[ket ti kaudian a damag kabayatan ti pannakaikurkur-it daytoy a blag ita, sangapulon a kameng ti gabinete ti naglusulos. ket ti kunada: "The President can be part of the solution to this crisis by making the supreme sacrifice for God and country to voluntarily relinquish her office and allow her constitutional successor, the vice president, to assume the Presidency."]

istratehia daytoy ni gloria. ta maal-alimadamad nga agsasaruno nga agikkat ti adu a kameng ti gabinete kadagiti sumarsaruno nga ladaw. wenno or-oras. isu nga inunaanen idan ni gloria.

ngem kasayaatan no ni gloria koman ti aglusulos ket itednan iti constitutional successorna, ni noli de castro, ti turay.

tapno maliklikan ti adu pay a gulo.

nupay saan a maliklikan latta ti gulo ta adu latta met dagiti saan a mangayat a ni de castro ti agbalin a presidente.

kas kadagitay adu a mangidurduron/mangdurdurog ken ni susan roces.

kasta met dagitay adu a mangayat a mangisubli kano ken ni erap iti malakanyang.

kasta pay dagitay mayat met a ni kano lacson ti rebbengna nga agpresidente.

kasta met dagitay mangilunglungalong iti military junta.

ay, gulo latta. uray man no sinno ngata ti inda ipatugaw a presidente ita, saan a maleplepan ti riribuk dagiti manangriribuk. ti gagem dagiti tirong ken kurimaong iti turay ken poder.

ala, ket mabatitay' nga kadawyan nga umili a mangpadaan iti sumaruno nga eksena...

ngem iti bukodko a panagamiris, saanen nga agbayag ti rehimen ni gloria. agsasaruno ket umad-adun dagiti mangipukpukkaw iti inna ibababa iti tronona. kastoy man idin ken ni erap agingga a natippuog met ti rinuker a rehimenna.

saanen a makatalna ti adu a tattao. ket no naggunay ti kaaduan a militar, no sino ti ayonanda, dayta, nalpasen.