global a gumil

gumildamag iti bannawag (damdamag, julio 18, 2005, panid 27):

GUMIL America,
GUMIL Global,
planoda a bangonen

Mapangpanggep ita ti pannakabuangay ti GUMIL America ken GUMIL Global, kas kinuna da mannurat Terry Tugade, Lorenzo G. Tabin, ken Cristino Inay Sr., kangrunaan a mangin-inaw iti pannakabuangay dagiti dua a gunglo. Kinuna ni Apo Tugade a no mabalin, mabuangay ti GUMIL America iti di naladladaw ngem iti Hulio. Kalpasanna, isarunoda a buklen ti GUMIL Global.

Para iti nayon nga impormasion maipanggep itoy a plano, agsurat kadagiti organizers iti ania man kadagitoy nga email addresses: gumilamerica@myexcel.com, gumilglobal@myexcel.com, l.tabin@comcast.net, samtoybannatiran@yahoo.com, ken globalexcel@myexcel.com.

Iti sabali a bangir, kinuna ni Dionisio S. Bulong, presidente ti GUMIL Filipinas a mainaig iti kiddaw dagiti organizers a pannakapalubosda, kinunana nga ad-adalen ti komite nga idauluan ni Arsenio B. Cortez, direktor, ti nasao a kiddaw.

nagsayaaten. nagpintas ketdin daytoy a plano, nangruna ti gumil global a masao. gumil global--mabalin nga ibagianna amin a mannurat nga ilokano iti iloko man wenno sabsabali pay a pagsasao iti isuamin a paset ken suli ti globo, ti lubong. kas pagarigan no addaka dita africa, dita zimbabwe wenno dita timbukto ket awan met mabalin a maurnongmo a kameng tapno koma buklenyo met ti gumil zimbabwe wenno gumil timbukto, daytoyen gumil global ti mabalin a pakaikappenganyo ta sakupennakayo la ngaruden daytoy ta global la ngaruden. malaksid a no timmayaktakka nga ilokano a mannurat a nagbalinka a maysa nga astronoto wenno piloto ket naipanka iti mision iti bulan wenno mars wenno naidestinoka iti maysa nga skylab, kasapulan payto ket ngata ti mabukel a gumil bulan wenno gumil mars wenno gumil solar system. wenno no kasapulanton, gumil milky way. santon gumil galactica inton maduktalanen ken maperpekton ni ilokano ti hyperspace travel to the stars.

angaw lang. nasobraak san ngamin ti agbasbasa iti science fiction (isu't ug-ugmokak ngamin ita dagiti obra da asimov, clarke, heinlein, silverberg, le guin, herbert kdpy santo pay la pinitlok a binuya daytoy episode III ti star wars agraman immun-una nga episodesna).

ngem unay a sayaatnan daytoy napanunotan dagitoy tallo a maraem ken malalaki a beterano a mannurat nga ilokano.

gumil global. global a gumil. gumil sangalubongan.

gumil global. mabalinna ngata met a sakupen uray ti makunkuna a cyberspace wenno worldwide web? daytoy virtual a globo a pagnanaedan met itan ti adu metten a mamannurat nga ilokano?

malagipko nga idi 1996 sa wenno 1997, insingasing 'toy numo ti pannakabuangay ti "gumil internet" wenno pumadpad a gunglo wenno nagan a pakatiponan dagiti mannurat nga ilokano iti internet wenno agin-internet (kinapudnona saan a siak ti immuna a nakapanunot iti daytoy, ni john teneza a.k.a. juan quinto gonzales, maysa a mannaniw nga ilokano a taga-maui, hawaii ken tubo ti la union, ti nangilungalong--binukelna ti "gumil internet" website [idi kano noviembre 18, 1995] ket idi masagangnak iti cyberspace, plinanomi a buklen kas sanga ti gumil filipinas, no mabalin.

ket isu, nagsuratak ken ni apo juan sp. hidalgo jr. (ta isut' bigbigek unay a fundacion ti gumil) naragsakan unay idi ni apo jsphjr. kinunana pay nga ipakaammok a pormal iti gumil filipinas ta isuda ti mangtaming.

ket isu ngarud, nagsuratak iti agdama idi a board ti gf. ngem diak ammo, diak malagipen no ania ti reaksion idi ti board ti gf. ta awan nagbalbalinan wenno nabalbalinan daydi a singasingko. parikut sa idi iti constitusion ti gf ta awan met ngamin ti provision sadiay maipapan kadagiti virtual a lugar wenno lubong a kas iti internet. dagiti la pisikal ken existing a lugar ti adda kas koma kadagiti probinsia, ili, grupo a pisikal, etc. ania ngarud, awan, siempre, ti cyberspace. isu nga awan ti nabukel a gumil internet.

awan a nabukel ti gunglo dagiti mannurat nga ilokano iti internet ngem adda dagiti mannurat nga ilokano iti internet.

agingga ita, adu ken umad-adu dagiti mannurat nga ilokano iti internet. ken addan makuna a kasla grupo wenno virtual a grupo dagitoy a mannurat a masarakan iti cyberspace. kas pagarigan koma dagiti bloggers ita a mannurat nga ilokano nga addaan kadagiti bukodda a blog wenno websites ken aktibo nga "aggiginnumil" iti internet. di kad' nakalawlawag ken nakapatpatak a kumpog ken gunglo dayta dagiti mannurat nga ilokano iti internet? hmm, saanen a masapul ti abbreviation a "gumil internet," ti napateg adda ti kompleto a kaipapananna.

itan, addan daytoy plano a "gumil global."

sapay koma ta agballigi daytoy a gannuat. naidumduma no kua daytoy a gunglo dagiti mannurat nga ilokano iti sangalubongan.

a mabalin a pakairamananmi met a mamannurat nga ilokano iti cyberspace.

ala ngarud, agbiag ti gumil!