diak nagustuan ti hp6 ken spoilers pay

nalpaskon a binasa ti harry potter book 6 ("harry potter and the half-blood prince"), idi kanikadua nga aldaw. bassitanna nga uppat nga aldaw a binasak (kaaduan nga iti rabii a pannakasango nga agbasa, ken no break time). medio nabuntog ita ti panagbasak ta kinapudnona laeng ket awan dagidi sigud nga excitement ken thrill a nariknak idi basaek dagiti immuna a libro, nangruna ti book 3 ("harry potter and the prisoner of azkaban") ken book 5 ("harry potter and the order of the phoenix").

wen, awan unay pikapikna (kaniak laeng, a, a maysa) daytoy maikanem a harry potter book ni joanne kathleen rowling. madlawko a kasla insamsambot ti panangsuratna (nupay dua a tawen sana inruar). medio dragging....

[warning gayam: no diyo kayat ti spoilers, diyo pay lang itultuloy a basaen daytoy a panablaag. basaenyo pay ti libro, a, ta didakto ketdin kagura met no agibagaak kadagiti pagteng iti libro ket diyo pay nabasa.]

wen, dragginggggg ti dadduma nga eksena a madlaw a pinangbennat laeng ni rowling iti estoria. awan unay ti action ita ditoy ta kinapudnona saan a nagsarang ken nagranget koma da harry ken ti arch-kalabanna a ni lord voldemort. adu ketdi ti dayta la napan nagsirsirip iti napalabas ti kinkinua da dumbledore ken harry (imbag ta di ket nagbunga, a, ti matada!), babaen ti pensieve a pangsiripan iti lagip ti maysa a tao. ket amin met la dagitoy a lagip a napan sinirsirip dagitoy dua ket maipapan ken ni voldemort a.k.a tom marvolo riddle. ta agur-urnongda piman kadagiti clue wenno hint ti weakenesses ni voldemort tapno agballiginto ni harry a mangparmek itoy a dark lord.

makapadismaya ta siempre, expektarek nga aglaban manen da harry ken voldemort iti ud-udi a paset a kas kas kadagiti immun-una a libro. ngem ita ket awan. ti pay ket makapasimron ket "pinatay" ni rowling ni dumbledore ditoy! ket saan a ni voldemort ti nangpapatay no di ket ni severus snape, 'tay mistro a kontrabida iti biag ni harry. ahuuu, saan a nakapapati ditoy dagiti paset wenno insinuations a napalalo la ketdin ti panagtalek ni dumbledore ken ni snape (a sigud a kameng ti death eaters, nagan ti kumpog dagiti pasurot ni voldemort) ket pulos la ketdin a di nagduadua ken ni snape a talaga nga adda iti dark side, iti side ni voldemort. ket kasdiay lattan, without much ado ti panangpapatay ni snape iti headmaster ti hogwarts, "avada kadavra!" kunana latta ket nagudasen ni piman a lakay albus! wenno ginundawayan ket ngata, a, ni snape ti credito wenno dayaw nga isuna ti manggudas ken ni dumbledore tapno maipaneknekna ti loyaltyna ken ni voldemort. wenno gapu kadi iti "unbreakable vow" a nasken a protektaranna ni draco malfoy wenno nasken nga isu ti mangaramid iti di maaramid ni draco? (update lang [26julio05]: mabasbasak kadagiti hp forums nga adda kano consent ni dumbledore iti ipapatayna. nga adda kano tulag da dumbledore ken snape, adda planoda tapno mapamatida ni voldemort iti loyalty ni snape ket iti kasta makapanen ni snape iti sidong ni voldemort ket espiaanna daytoy para ken ni harry. diak ammo, awan panawenko nga agspeculate wenno agteori-teori maipapan kadagitoy a banag. ibagbagada pay a ninto met la snape, or even draco, ti mangpatay a mismo ken ni voldemort. ngem kasanon ni harry a kas "chosen one" a mangparmek ken ni voldemort?)

kahuu, bitin pay a talaga daytoy nga episodo ti biag ni harry potter ta di pay met amin nasarakan ken nadadael da dumbledore ken harry dagiti horcrux ni voldemort. di pay naammuan ditoy no sinno a losngi daydiay napan nangala iti horcrux idiay tengnga ti dan-aw a napno iti inferi, iti uneg ti gukayab. talaga nga insaganaan ni rowling daytoy, nagibati iti adu a misterio ken questions iti book 6 tapno iti kasta agkakatayto man dataon a manguray iti book 7 a maudi kanon nga episodo ti harry potter.

ti makapasuron pay gayam iti book 6 ket dagiti nagkokorni ketdin a love story da harry ken ginny, ken da ron ken hermione. hmp, maawatan met ketdi ta teenage romance dagitoy. ngem napalalo met ti kinaarte wenno kinabaduy ken kinakorni nga impakat ni rowling a ti panggepna ngata ket tapno kilig to da bones ti agbasa. huu, diak man la a kinilig!

hmmm, kustonan, adu unayen nga spoiler. inkay' ketdin gumatang met iti kopiayo no kursunadayo met a basaen.

kabayatanna, ituloyko man laengen a basaen dagitay pangtedko a libro nga impasulik gapu iti hp6.