marso, abril, gumil

marso man gayamen. ne, ket mabaybay-ak met a mabaybay-anen daytoy pagpanablaagan. ningaskugon a talaga. lag. laglag. lumaglaglag a lumaglaglag. lag ti kur-it, lag ti kurdit, lag ti sulnit, lag ti lunit, sal-it. ala, adtoy kumur-itak man met ngarud tapno adda laeng met maisulnit a kurdit tapnon di aglunit daytoy a blag, hehe!

sumro ti kinasulit latta ken kinasadut nga agsurat ti uray lang blag wenno la koma pirgis ti daniw koma.

marso manen. kalgaw. cuaresma. bakasion. ginnumil.

wen, ginnumil, asideg man gayamen. inton abril. bareng, a, no makapan wenno makadaw-asto datao. diak man ammo, pakawanendak, kagumilan, ta saan met a kas idin karegget ken kaaktibo datao a makigumil. manipud idi narugiak ti nakigumil idi 1991 (sa?) idiay angadanan, isabela diretso daytan a nakigumgumilak. ti lang maysa a libtawko ket daydiay kombension idiay vigan, iti unp, ania man a tawen daydiayen, aya? medio nalibtawak met daydiay kombension a naangay idi idiay lareglareg, malasiqui, pangasinan idi 1996. medio kunak man lang ta diak nadar-ayan a kompleto, simmambotkam' (dakam' ken 'tanud dln, ta gapgapumi idiay baguio idi ta kalkalpas ti workshopmi idiay) laengen iti maudin nga aldaw ken paset ti programa.

itan, iti manen ginnumil a nagsubli manen iti sigud a pakagumgumilanna-- iti suso beach iti sta. maria, i.s.-- diak ammo no makadar-ayak. ta, pakawanendak, kagumilan, agsasadutak metten a makigumil. diak ammo man no apay. saanen a kas idi baro pay datao ken kapadesko nga agsurat.

hmm, no kasta, gapu ngata, aya, ta ginumildak metten (wenno nakasarakak metten iti gumugumil a kagingginnumilko a naynay ken iti agnanayon) ket awanen aayatan/kakayatan a makigingginumilgumil pay laeng manen? diak ammo. diak man ammo. saan met adayta ti rasonna ngata. huuu, apay awan la iiliwamon kadagiti kabaddungalam, kakaduam, kakabsatmo a mamannurat, aya, kunayo ngata? maminsan lat' makatawen daytoy, sika met, sayo ipasaruno.

ala, wen, kitaekto... aguray ta ipanablaagko pay daytoy ngarud. hehe, adda met la naikut-itkon a ti la adda a napampanunot nga ipanablaag....