mannurat.com mannurat.com mannurat.com mannurat.com mannurat.com mannurat.com

mannurat.com 9/14/2004

kakaisuna a libro piman

diak ammo a nagpukaw gayamen ti linked page a pakadownloadan (a libre) daydiay kakaisuna a librok iti sigud a siteko. nabayag gayamen a naguped ti accountko iti hypermart.net (a sigud pay nga agho-host iti defunct itan piman a burnay e-magazine). dati nga adda libre nga account iti hypermart idi ket isu ti inusarko ta mabalin pay idi ti sumagmamano cgi scripts a kas iti inusarko iti download form ti nasao a libro idi. ngem itan addan bayadna, awanen freebiesdan.

eniweys, eniweys, ania daytoy libro a taltalanggutangek, aya, ditoy?

librok piman 
isu ngarud dayta makitat' imahen ti akkubna dita kanigid. diak ammo, a, no nakitkitayon daytoy idi no sigud a maisarsar-ongkayo iti websiteko. no ita la a maimatangan wenno maammuanyo, palubosandak a mangitabtab iti sumagmamano nga inpormasion...

inaramid ken "impablaakko" daytoy a libro idi 2000. ne, ket uppat a tawenna gayamen, sika! nagsursuruak man nga agaramid iti makunkuna nga electronic book. panagkunak isu daytoy ti masao nga umuna wenno kaunaan nga ebook nga/iti iloko. wen, a, ta awan pay met ti ammok nga iloko nga ebook a naipablaak wenno naparnuay idi 2000 ken uray agpapan ita iti man pdf, nga isu ti de facto a format ti kaaduan nga ebook, wenno iti dadduma pay a pormat wenno tipo. isu a maawatandak latta koman no ibagbagak wenno ipangpangasko bassit a daytoy ti umuna/kaunaan nga iloko ebook (ngem no adda mangibaga wenno mangipakita nga addan immun-una ngem daytoy, awatek a siaanus, a, hehe!).

wen, uppat a tawennan. idi ar-aramidek daytoy, nagpintas man ti planok idi ta kayatko ti agaramid iti adu nga iloko ebooks. kayatko koma a rugian met iti iloko ti makuna a success ti ebook publishing iti english. wenno uray saan pay 'diay success koma, a. basta marugian lang wenno mauso laeng met tapno adda met, a, koma iloko nga ebook a kadua dagiti sumangkaadu nga ebooks iti english (wen, ta amin a bestsellers itan, addan ebook versionna a magatang online, kas koma ditoy, ditoy, wenno ditoy) nga adda kadagiti computer wenno pda. ngem nagpatingga la a plano. adda dagiti narugiak kalpasan daytoy "Napili ken Saan a Napili a Dandaniw ken Dadduma pay a Riknakem" ngem diak idan naituloy agingga ita (narugiak pay ketdin, a, nga ikombert iti ebook format daytay "Anaraar: 21 a Napili a Sarita iti Iluko" a libro ti GUMIL Metro Manila, a nakairamanan ti maysa a saritak). diak man ammo ta naawan sa ti reggetko. ngem diak la ammo, baka ituloykonto met laeng. tagiurayko pay ngamin nga adda kalalainganna a maurnongko pay a sinuratko ta yaramidak manen iti ebook. sarita ti panggepko nga isaruno. santo filipino wenno tagalog a daniw ngatanto, no di lumagto, wenno dinto nga into lumagto 'diay bato.

maipapan pay iti daytoy ebookko... hmm, masadutak metten wenno diak met ammon ti nasayaat nga maibagak, hehe! basta. daytoy ti kakaisuna a librok wenno ebookko. makuna a naipablaak babaen ti kunkunada a "vanity publishing" wenno ipablisna-librona-tripna-'dim pigilen. kursunadak ngarud nga "ipablaak" dagiti daniwko in bookform, ania komat' bibiang ti makibiang? saan a komersial daytoy, saan a "for mass production in million copies and to be translated in the world's major languages sa mailako worldwide." awan intensionko nga agbalin a j.k. rowling wenno stephen king. for posterity la ngata. wenno kas "kontribusion iti agamang ti literatura ilokana" a kanayon a makunkuna (wenno "kunkuna"da laeng?)? a, basta. addan librok, addan ebookko, ket agaramid ken agipablaakakto latta pay.

kaw-idek man latta ngaruden ti "blurb" kampay idi ti ebook nga naikabil iti dati a website:

"Urnong a 40 a dandaniw manipud immuna a naggandat nga agserioso nga agsurat iti daniw nga Iluko ni Aragon idi 1989 ken agingga iti 2000. Iti dandaniw/panagdandaniw ni Aragon, kastoy ti makuna ni Dr. Aurelio S. Agcaoili, kritiko ken propesor iti pilosopia ken literatura ken premiado a piksionista ken mannaniw: "Managpaliiw ni Aragon kadagiti inaldaw a pasamak. Saan a makaligtas kenkuana ti maipapan kadagiti fastfood chain a ti prankisada ket nagatang pay manipud iti sabali a pagilian ('Masmasdaaw ni Ambong'), ti maipapan iti awan patinggana a trahedia ti militarisasion ('Ni Insin Unyor a taga-Marag'), ti desperasion iti panagut-utek a kolonial ('Snoopy, ti bida nga aso'), ti nakas-ang a kasasaad ti masa, ti salamanka a kasasaad ('Hunio dose ni nawaya'). Ti nakalemmeng nga istratehia nga ar-aramaten ni Aragon ket ti manarsarita a poetik nga imahinasionna. Is-istoriaannaka, sarsaritaannaka laeng maipapan kadagiti 'babassit' nga agbibiag: ni Insin Unyor, ni Snoopy, ni Ambong, ni nakurapay a nakarian iti gin-awa ken wayawaya. Ngem iti panagis-istoriana, alaennaka ni Aragon iti maysa a lubong a rumimatrimat ta sadiay ket saan nga agtagtagilinged ti kinapudno, saan nga im-imbentuen dagiti public relations specialists ti estado ken dagiti kaaliadoda nga institusion. Ti kinapudno ket nadara, nabangsit, makapasimron, makamurmuray, nasaem, nasugpet--iti ababa a pannao: nalawag a kinapudno. Agdadata a kinapudno: sipapaparang, awan ilemlemmengna, awan ilinglingedna." Paliiw pay ni Dr. Agcaoili: "...maripirip (ken ni Aragon) ti maysa a naisangsangayan a sirmata a nakaramut iti konsepto a ti daniw ket maysa a rebolusionario a panagimutektek iti rikna, iti nakem, iti realidad--iti ababa a pannao, daytay naisupadi gapu ta baro ken napabaro a panagipatarus iti bugas ti inaldaw-aldaw a padas."

libre a libro, kunak sa itay?

wen, libre latta daytoy a libro. diak ilako. parapadawat iti mayat a mangbasa wenno makabasa.

downloadenyo ngaruden 'toy ebook (328 KB a .pdf file). bareng magustuanyo dagiti daniw. wenno magustuannakayo dagiti daniw.

2 makuna:

idi 6:09 p. m., septiembre 14, 2004, Blogger fionski nakunana...

Roy apay nga iniakar mo idtoy? Awanen diay napintas mo nga website?

 
idi 7:35 p. m., septiembre 14, 2004, Anonymous Anónimo nakunana...

hi, fions? thanks for dropping by! adda pay laeng daydiay dati a websiteko, yak-akarko laeng ti dadduma a pasetna ditoy. mabalin latta pay nga aksesen iti http://sinurat.sphoting.com

--rva

 

Publicar un comentario

<< Home