'tay daniwko iti bannawag

hmmm, yeheyyy! adda man met laeng manen gayam naipablaakko iti bannawag! daniw, kunam man, hehe! maayatanak ta ita man laengen nga adda makitak a sinuratko iti maysa a magasin (printed). nabayagen a diak nakaipaipablaak piman. ti sadutko ngaminen nga agsurat ken agipatulod. ita adda met maysa a daniw a nakalusot manen iti bannawag, yeheyyy! bareng addanto pay manen, a! (no mabalin pay 'tay maysa ken ni manong prodie, hehe!)

sapay baka agilem ni ariel (s. tabag ti rimat) ta diak met la maited 'tay requestdan a para met iti rimat. no nagsadutak metten nga agsurat. wenno diak makasurat san no diak itim-og 'toy ulo. planok koma pay ti makisalip kadagiti adu a pakikontesan ita, diem! sa tarimnek koma pay 'tay impalancak (a naabak) ta amangan no ilabanko manen no awan baro a sarita a maputarko ita. panggepko pay met koma pay ti mangaramid iti ipadasko iti futuristic fiction a filipino iti palanca. adu nga idean iti ulok ngem dida met agmata!

adtoy gayam 'tay daniw (naipablaak iti bannawag, iti set. 6 nga isyu):


Palimed ti sugel

Adda palimed ti kada sarungkarmo iti ridepko.
Nakabalunet dagiti tawa laeng, ketdi, saan dagiti ridaw, makastrekka
a siwawayawaya iti aniaman nga oras a kayatmo. Isuna
laeng ta sikakandado ti kada burburtiam: kaanom kadi nga ipaduyakyak
ti gagem dagiti mata a surotsurot iti kada innak panagtuglep?
Kaanoak nga umagek iti dagam, ania kadi ti kaipapanan
dagiti agkaiwara a tulang iti uneg ken ruar ti siledmo?
Ania kadi ta adda yar-arasaas a diak maawatan
dagiti blanko a papel iti katrem, ania ti aramidek
iti kada masarakanka nga agsangsangit iti pannaturogko?

Kas kaanus ti alutiit iti bobeda, agur-uray
ti kada ipapanawko iti isasangpet dagiti sungbat.
Sikbabek ti kada umasideg a lamok ken insekto. Mabisinak,
kanek ti aniaman nga idasarmo a pagilasinan iti ridepko.

Adda misterio ti kada yebkasmo a kararag.
Adda birtud ti kada yarungaingmo a dawat wenno imno a dayyengem.
Agtaltalekak pay laeng kadagiti anito iti barukong, pus-ong, luppo
ken takiagmo. Makilualoak iti kada ibalikasmo nga ayat ken isisina.
Siak ket disipulom, siak ket sakristanmo, sikat' pamatiak a babaylan.
Surotenka, ken dagasenka, latta iti darepdep. Uray iti batibat.

Adda palimed ti kada sarungkarmo iti sugel
ken pagugo ti saka ken dakulap. Nawayaka, anian a waya, luktak
uray dagiti tawa: kaanom nga ipalnaad ti pakdaar ti muging
iti kada panangdakamatko iti naganmo? Kaano kadi
a makagiddanak iti lallaymo a pagpatuglep? Ania
ti kalintegan dagiti tukkol a lapis iti saklotmo? Agsalsaludsodak
a kankanayon uray dika a sumungsungbat. Kayatak
ti agsalsaludsod, magustoak dagiti saludsod
nga uray awanan sungbat.

Agtutuglepak, kayatka a makita manen iti ridepko.
Maturogak, kayatka a makatakunaynay iti pannakaisugelko.
Bay-an nga agtuglepak, bay-an a mairidepak.
Daytoy ti palimed, daytoy ti misterio ti sugel ken kararag.
Kanayon ken kankanayonak a mamati ken mamatpati. Amen.